«Қазақ халқының дәстүріндегі қыз бен ұл тәрбиесі» тақырыбындағы пікірталас
Сонау заманнан келе жатқан салт-дәстүрдің қуанышы мол, қызықтысы: ұлын ұяға қондырып, қызын қияға ұшыру.
Бауыржан Момышұлы: «Біріншіден, бесік жырын айтатын келіндердің азайып бара жатқанынан қорқамын, екіншіден немерелеріне ертегі айтып бере алмайтын әжелердің көбейіп бара жатқанына қорқамын, үшіншіден, дәстүрді сыйламайтын балалардың өсіп келе жатқанынан қорқамын», – деген екен. Қазақ отбасында ұлттық тәрбиенің негізі – халықтық педагогика болғандықтан, баланы ұлттық салт-дәстүрлер аясында тәрбиелегенін тарих та дәлелдеп береді. Ұрпағымыздың бойына ұлттық тәрбиені, имандылық қасиеттерді сіңірсек, халқының әдеп-салтын жақсы білетін, ата-анасын сыйлайтын, ел үшін еңбек ететін ұрпақ тәрбиелеген боламыз. Осы мақсатта 8-10 сынып оқушылары арасында «Қазақ халқының дәстүріндегі қыз бен ұл тәрбиесі» тақырыбындағы пікірталас ұйымдастырылып өтті. Пікірталас барысында «Үкімет» тобы қазақ халқының дәстүріндегі баланың тәрбиесінің мәнді, берер өсиетінің көптігі жайлы айтса, «Оппозиция» тобының оқушылары заманауи тәрбиенің қоғам дамуының бір бөлшегі ретінде алар орны туралы ой қозғады.